Ehsan Ağayi - Darıxsan Xəbər Elə

Ruhum tənha gecədir
Açılan sabahlara.
Özümə söykənirəm,
Öz çiynimdə ağlaram,
Gəl, baş qoyum çiyninə.

Səsin – külək nəfəsi,
Sığal çəkər saçıma.
Gecələr yuxu səpər,
Heca-heca içimə,
Səni geyər əyninə.

Darıxsan xəbər elə,
Sənə həsrət yollayım.
Nə vaxt üşüsən çağır,
Sətir-sətir dolayım
Qollarımı boynuna.

Təkliyin hər sancısı,
Qollarımı qarğıyar...
Qadın rəngli duyğular
Misra -misra ağrıyar,
Şeir doğar qoynuna.

Mən sevgiyə tövbəkar,
İndi qarşında aciz…
Hansı obraza dönüm?
Axı nə bəxş edək, de,
Bu həyat oyununa.