Bülbül qonur gül qoluna,
Ətrin alıb bənövşənin,
Pəncərədən gir qoluna-
Baharı gətir, səmənim.
Yazda evlərin qonağı,
Ambardan taxıl sınağı,
Elin-obanın dayağı,
Zəmilər bitir, səmənim.

Bitir fəsillər savaşı,
Gedir ormanın təlaşı,
Zərif Naxçıvan lavaşı,
Bakımızın paxlavası,
Qarabağ şəkərburası,
Bal kimi-fətir, səmənim.

Ümidi sənə-ellərin,
Sünbüldə-qızıl tellərin,
Zəfərli yaşıl əllərin
Şuşaya yetir, səmənim.

Qələbələr çalmaq üçün,
Yurda dayaq olmaq üçün,
Sünbüllərə dolmaq üçün,
Çöllərə gedir səmənim.