İstədim sirrini biləm dünyanın,
Dedilər: - Ay bala, əbəsdir, əbəs.
Həyatda yaşayan hər bir insanın
Ürəyindən keçir belə bir həvəs.

Hamı da çalışır arayıb, tapsın,
Bu sirli dünyanın düyünlərini.
Cavabsız olsa da, bu işdən ötrü,
Çoxları yorublar beyinlərini.

Suallar cavabsız, suallar açıq,
Fikirlərdən doğur fikirlərimiz.
Oyanan Günəşlə oyanır varlıq,
Bu dünya həm sevinc, həm qəm yerimiz.

Bu qoca dünyanın yaranışından,
Həqiqət hər şeydən durur ucada.
Bunun özü artıq bir həqiqətdir,
Bunu bilməlidir gənc də, qoca da.

Yaşanılan hər gün ömürdən gedir,
Qaytara bilmirik ötən bir anı.
Yaşanan nə varsa, könüldən gedir...
Tələsir, dayanmır ömür karvanı