Şamo Ziya - Ata

Sənsən elə sultanı bu dövranın atan varsa.
Çox şeylərə vardır sənin imkanın atan varsa.
***
Kimdir atanın varlığı dərk eylə sən əvvəlcə.
Qızmar günəş altında bir üstündə duran kölgə.
Dostum dediyin çoxları dar gündə qaçar bəlkə,
Ancaq sənin uğrunda verər canın atan varsa.
***
Vallah atasız ömr təlatümdü həzin keçməz.
Çox şeyləri istər könül, ancaq ki, üzün keçməz.
Olsan yetim hər bir yerə getdikdə sözün keçməz.
Heç yerdə görünməz gözə nöqsanın atan varsa.
***
Övlad atasız olsa onun qeydinə qalmazlar.
Ahın çox alarlar, ama heç könlünü almazlar.
Yadlar hələ bir yana yaxınlar yada salmazlar.
Mehman ilə hər gün dolar ünvanın atan varsa.
***
Hər kim qaya parçasını görər dağda deyər dağdır.
Dağdan qoparılmış qaya daş parçası ancağdır.
Dağ var sənin arxanda atan hər nə qədər sağdır.
Bil qədrini sağlıqda o insanın atan varsa.