Ramal İsrafilov - Qurban Olduğum

Bilməm, məni neyçün atmış, unutmuş
Əhdi-peymanına qurban olduğum.
Yoxsa özgəsinə üzünü tutmuş
Yeni sevdasına qurban olduğum?

O mənim sevgilim, o mənim sonam,
Onsuz üzüm gülməz, açılmaz aynam…
Deyin (Bilməm), harda qaldı o nazlı durnam,
O xoş sədasına qurban olduğum.

Mən dilbəri sordum gəlib-gedəndən,
Dedilər, barışmaz, küsmüşdür səndən,
Mən iltifat etdim, o qaçdı məndən,
Qaçqın ədasına qurban olduğum.

Ayrılıq oduna könül dayanmaz,
Eşq oduna yanan bir daha yanmaz,
Çəkdiyim nalədən neçin oyamaz
Şirin röyasına qurban olduğum?