Arzum budur ey gül, mənə canan olasan sən,
Gülşəndə mənim üçün gülü-xəndan olasan sən.
Bir şaham bu eşqdə başımın tacı səndə,
Var odlu baxışlar necə gör qıyğacı səndə.
Rəhmin gələ yarım, dərdin var əlacı səndə
Mən istərəm ki, dərdimə dərman olasan sən.
Arzum budur ey gül, mənə canan olasan sən,
Gülşəndə mənim üçün gülü-xəndan olasan sən.
Bəsdir bu qədər naz belə rəftar ilə gəzmə,
Dəryayi-qəmə qərq olan qəmxar ilə gəzmə.
Atma məni ey gül, gedib əğyar ilə gəzmə
Mən istəmirəm ki, sonra peşman olasan sən.
Arzum budur ey gül, mənə canan olasan sən,
Gülşəndə mənim üçün gülü-xəndan olasan sən.
Bir evdə ola bünövrə əla dağılarmı?
Bir kəlmə ilə könüldə sevda dağılarmı?
Yüz yol dönürəm başına, dünya dağılarmı?
Bir yol dolanıb başıma qurban olasan sən.
Arzum budur ey gül, mənə canan olasan sən,
Gülşəndə mənim üçün gülü-xəndan olasan sən.
Eşqinlə verdim gəncliyimi badə təkəm mən,
Bir kimsəsizəm bu fani dünyadə təkəm mən.
Ötsə də yaşım, indi də azadə, təkəm mən
Bəlkə bu günümdə mənə mehman olasan sən
Arzum budur ey gül, mənə canan olasan sən,
Gülşəndə mənim üçün gülü-xəndan olasan sən.
