Şahid Əliyev - Qadın

Deyirsən şeir yaz nə yazım sənə,
Təpədən dırnağa şeirsən qadın.
Nəyini vəsf edim, nədən söz açım,
Sən özün hər şeyi deyirsən qadın.

Səndə gözəlliyi görənə əhsən,
Qədrini biləcək ərənə əhsən.
Səni bu dünyaya verənə əhsən,
Bütöv bu dünyaya dəyirsən qadın.

Anasan, bacısan , övrətsən, yarsan,
Torpaqsan, ocaqsan, qeyrətsən, arsan,
Nə gözəl varlıqsan, nə gözəl varsan,
Haqqın var özünü öyürsən, qadın.